A lembranza das navegacións da Antigüidade está presente na primeira sala cunha interpretación da Torre de Hércules como faro realizada por Carlos Sobrino. Pero sobre todo salienta nela o recordo das invasións normandas de mediados dos séculos IX e X. Galicia sufriu estas invasións que orixinaron a construción de varias torres na costa para contrarrestalas ou evitalas. O debuxo por parte do mesmo autor dos restos da torre situada na praia da Lanzada, ou as fotografías das Torres do Oeste en Catoira son só algúns exemplos.

A carón destes testemuños e referencias ás invasións viquingas, exponse un modelo das embarcacións que usaban estes grandes navegantes. Trátase da nave de Gokstad, atopada en 1880 nesta localidade norueguesa baixo un túmulo de terra, ó ser convertida en panteón funerario. O modelo que se expuxo ó inaugurarse as Salas Navais fora regalado polo rei Oskar II de Suecia e Noruega a Afonso XIII en 1888 e depositado por orde da Raíña Rexente no Museo Naval de Madrid. Permaneceu no Museo de Pontevedra durante algúns anos ata que foi devolto por mor do interese manifestado polo Museo Naval en expoñelo nas súas salas. Para podelo substituír, concluíuse en 1950 no obradoiro do noso museo unha copia exacta que é a que actualmente se exhibe.